美洲國家盃C組最後一輪，阿根廷、巴拉圭已經出線，今仗對碰只係爭首次名。基斯普及米列圖缺陣，難免影響阿根廷攻守能力，而且領隊巴斯利講過分組賽會輪換球員，今仗料會收起部分主力。巴拉圭目前打起信心，首選「讓球客勝」，進取可敲和局。（有線足球台61周五早上8時50分直播）
美洲國家盃開鑼十日，毫無疑問阿根廷係最佳球隊。各個球星都狀態良好攻守有度，先後輕取美國及哥倫比亞，贏波過程踢出王者風範。巴拉圭亦令人驚喜，首仗大數哥倫比亞，次仗贏美國亦未遇考驗。兩軍均積六分已攜手出線，故今仗只係首、次名之爭。
阿根廷目前因得失球差不及對手而排第二，若今仗贏唔到就係次名，八強對手大有可能係墨西哥，或者係死敵巴西，而首名出線的話就對秘魯，雖然首名出線對手較弱，但拿仁認為阿根廷避免再添傷兵，唔會冒險硬撼搶首名出線，拿仁相信阿根廷今場只會以平常心應戰。相反巴拉圭知道首名出線，八強會對秘魯，仲唔嗒晒糖咩！今場和波都掂，一定搏老命死頂。
巴拉圭射手有料到
阿根廷頭巴斯利曾經表示，於分組賽會盡量畀後備上陣，所以今晚陣容可能會有大變；加上前鋒基斯普因傷退隊、中堅米列圖又累積夠黃牌而停賽，阿根廷戰鬥力減弱，巴拉圭有力偷雞。
巴拉圭本屆令人耳目一新，攻力更令人刮目相看，辛達告魯斯、奧斯卡卡度素兩名射手都有料到，遇上陣容大變阿根廷，要一分奪小組首名機會頗高
