阿根廷同巴拉圭今屆美洲國家盃C組同樣係兩戰全勝提早出線，不過巴拉圭就因為較佳得失球排頭位。換句話講，阿根廷如果想八強執好籤對秘魯，今仗就係非勝不可。有鬥志，以佢今屆對冠軍志在必得陣容同近仗氣勢，要砌低實力差一截巴拉圭唔難，一於熱捧主勝啦！（有線61及64、中央5台周五早上8:50直播）
C組首名將會八強撞上A組次名秘魯，雖然話阿根廷實力超班，但斷估佢唔會捨易取難。既然打真軍，試問阿根廷又點會驚巴拉圭先，話就話大家都係兩戰全勝，但阿根廷兩仗都係踢逆境波先失一球再反勝，盡見真功夫，絕對唔似巴拉圭有對手間中送大禮全取六分。
列基美華朗擦出火花
阿根廷開頭最擔心速度太慢中場組合華朗拍列基美，結果兩部發電機一齊擦出火花，長短傳一樣掂，對手根本防不勝防。至於話殺手基斯普雖然上仗受傷，但後備席廂都仲有泰維斯同迪亞高米列圖畀領隊巴斯利揀，前線支支大炮支支堅，要贏波有乜難度先？
巴拉圭之前演出當然有晒交代，但始終人腳有限，今仗會唔會留力已經難講。況且，佢今仗和波都首名，隨時玩死守，但正所謂久守必失，到時咪盞捉蟲！今鋪一於撐阿根廷贏波做C組首名，八強戰秘魯啦！
