美洲國家盃C組壓軸戰，哥倫比亞同美國會委內瑞拉巴基西梅托對壘，兩隊分組賽頭兩場輸晒，實力明顯只係有限公司，踢埋今朝兩場B組賽事，兩軍分分鐘已經出局，所以今場賽事競爭味道不大，大家會放爭取首場勝仗，有望延續今屆賽事「大」風，蘇豪一於追大盤。（有線足球台61周五早上6時35分直播）
兩軍後防鬥曳
哥倫比亞首仗淨吞巴拉圭五蛋後，演出之差嚇驚唔少人，第二場再以二比四輸畀阿根廷，兩場波失九球，豆腐防線原形畢露，今屆賽事完全令人失望。雖然有哥度巴同耶比斯等有料之人，但佢後防已經失晒信心，短期內恐怕難即時作出調整，對住同級弱旅美國亦難保不失。
美國今屆派出大量二線兵同新丁，基本上玩美洲國家盃都係畀面派對，分組賽兩戰全敗係意料中事。由於今次參賽目的只為練兵，所以佢唔會改變作戰方針，繼續畀班球員磨練。球隊首兩戰失七球，完全暴露防線不穩問題，同哥倫比亞一樣唔守得，今次兩隊交手，睇怕會大演入球騷。
美國門將基拿目前冇班落，如果遲冇人斟隨時退休，今場隨時係佢收山前最後一戰，相信班隊友會落足力幫佢留個美好回憶。由於兩隊實力好接近，雖然哥倫比亞牌面睇落好，但目前讓波信唔過，由於今屆賽事狂吹「大」風，入球「大」確有可取之道，一試無妨！
