首回合伊奧維主場本來踢得唔錯，偏偏球員好衰唔衰上下半場各犯一次天條，兩個極刑就輸○比二，力奇唔係話落後兩球冇得翻身，之不過輸呢陰功波洩氣嘛，要伊奧維今晚作客贏番場睇好難。
伊奧維客勝率唔夠四成
再講，力奇睇過伊奧維今季作客成績，話就話排英甲第五，但二十三場作客波只係贏得九場，都未夠四成，以佢家陣惡劣形勢，既唔會求和算數，最怕到時貪勝不知輸，輸突擊再畀森林多兩粒冇仇報咋！何況隊長史基華頓受鼠蹊傷患困擾，到依家都未有消息話復出，靈魂人物唔度，想追就難上加難。
主隊方面，係英甲主場成績第三佳球隊，地頭出擊從來都係贏波保證。事實上，森林近年兩次主場對伊奧維，就分別贏一比○同二比一，就算計埋作客，近四次交手又係贏足四次，「恰」到伊奧維一戙都冇，點睇今鋪都唔似會失手。
仲有，森林今仗仲好大機會有兩名猛將復出，修咸頓借將中場般頓同首席射手格蘭侯治據聞都已經傷愈，至少都可以做後備隨時落場，特別係格蘭侯治，今季聯賽已經入十三粒波，只要佢披甲，伊奧維後防都有排騰呀！
