日職醒神推介
前鋒季初兼顧聯賽同亞冠盃兩條戰線，月初主場贏埋印尼球隊阿雷馬後，已肯定以首名姿態晉級八強，成績仲好過名氣球隊浦和紅鑽，由於隊中冇乜大牌球星，國內傳媒譽為日職史上最強雜牌軍團，演出贏盡口碑！前鋒提前出線，下周亞冠盃造訪曼谷大學已成例行公事，可將注意力放番落聯賽。
新攻擊鐵三角夠火力
前鋒季初表現有走樣，經過適應期後，近期已重現驚人火力，近兩場聯賽狂轟八球，雖然我那霸和樹因注射禁藥要停賽，但另一土炮箭頭黑津勝乘機上位，近期拍住巴西鋒將祖尼奴，加埋森巴快翼馬治林組成全新攻擊鐵三角，三人合共取得十五個聯賽入球，效果相當理想。
三神急瀉近六戰五負
三神情況差得遠，好似食瀉藥咁，近六戰一勝五負，加埋只入得三球，平均踢兩場先入一球。射手松橋章太因傷續休戰，「雙高」前線組合高松大樹同高橋大輔態沉，兩人加埋只得三個聯賽入波，前者今場仲要停賽，單靠死守頂唔到幾耐，就算主場出擊亦信唔過。
同日甲府風林會主場迎戰清水心跳，風林近八場聯賽七次開大，中場茂原岳人剛當選上月MVP，對球隊有正面影響，心跳大腦藤本淳吾狀態大勇，兩隊鬥攻入波唔慌少，入球大有計！
