意大利盃決賽次回合打到，國際米蘭今晚主場再戰「雌狼」羅馬，主W就好似佢個後防咁，十級高危！事關國米有馬特拉斯坐波監，根本唔夠人用，防線穿晒窿邊有得救？撞羅馬隊長托迪要入波慶祝囡囡出生，試問點會錯過威好機會？客W好分博得過！（開賽時間：周四晚11:30）
首回合國米慘負二比六，次回合有咩本錢翻身？唔多喎！阿祖安奴有可能被踢走，練文仙尼用膝傷做藉口雪藏佢，換句話佢同伊巴謙莫域、告魯斯都唔踢得，意味文仙尼只得基斯普、列高巴兩個前鋒用，默契輸蝕晒，想話創造奇難上加難。其實以國米班底，淨勝四球捧盃唔係冇可能，但唔似呢個時候發生囉。
王子有Heart省多兩粒
不過咁都未算命，最慘係馬特拉斯累積黃牌停賽，森美爾養傷，搞到後防唔夠人用，究竟邊個會拍住哥度巴踢中堅？左閘貝迪素？新仔安祖奧利？對唔住！國米近兩場狂失九球，佢唔似有本事做救世主，大戰前夕後防被迫大執位，而且仲有中場達葛治停賽，唔通呢場反而有脫胎換骨表現？講都冇人信！咁搞法想有運行都難！
至於首回合領先「雌狼」羅馬會唔會輕敵呢？睇落唔似，佢聯賽主場對拖連奴擺明留力，迪羅斯、文仙尼、彭路基全部冇踢正選，最多都係後備上陣三十分鐘，托迪仲賽前提醒隊友，千祈唔好學巴塞咁次回合慘敗，最好係當正○比○再鬥過，咁有Heart，相信托迪囡囡唔憂冇禮物收，省多兩球啦王子！
