先提提大家今場並非普通德甲咁簡單，而係北萊茵區一場重要打，史浩克04為面子又好，為重奪失落四十九年聯賽冠軍都好，今晚爭勝意欲絕對唔使多懷疑。朱楓為呢場波做足功課，發現史浩克○○至○一年度本來好大機會奪標，點知倒數第四周（今場都係倒數第四周）作客畀波琴摸和，搞到以一分之差飲恨畀拜仁屈居亞軍，正所謂前車可鑑，史浩克今晚必定有備而戰，唔會再畀歷史重演。
德甲作客王盯死基卡斯
史浩克係今季德甲作客王，十五戰獲八勝三和四負，作客得勝率超過五成。該隊練史隆卡話球隊近期連贏三場兼冇失球，絕對唔驚波琴射手基卡斯，仲話緬恩斯穆罕默德施丹及科特布斯拉度同基卡斯屬於同類型球員，既然史浩克近期遇前兩者都可以睇到貼貼服服，要阻止基卡斯入波相信唔係問題。雖然史浩克賽前指卡斯達積因傷肯定缺陣，至於連干同隊長保頓就上陣成疑，不過朱楓相信九成係煙幕，話晒剩番四場波就可以奪標，史隆卡又點夠膽唔出佢搏殺！
波琴近八場贏四場，算係唔錯，不過朱楓如果問大家除識基卡斯之外，又識邊位波琴球員呢？相信唔係太多人答得出，再講就算波琴基卡斯踢到識飛，點睇都唔夠國腳如雲史浩克砌，破到蛋已經算有交代！
