英超榜尾形勢看似明朗，實情係暗湧處處，度士睇完個聯賽榜，發覺今晚韋斯咸主場對米杜士堡呢場好有投注價值，「錘仔」距離護級線相差八分，餘下賽程全屬生死戰，今場小讓無欲無求米堡平半，上盤捧得過。（泰星Ｕ40周六晚10時直播）
近期護級賽事戰果古靈精怪，韋斯咸領隊古比士利賽前出口術，炮轟今仗對手米堡上輪賽事放水畀曼城，度士就會諗，言下之意係：「你放得畀人，冇理由賴低我？」
米堡殘陣大條道理輸波
今晚查爾頓火併韋根，總有一隊甚至兩隊齊失分，而錫菲聯作客保頓亦好難打，韋斯咸今場對米堡，係最有機會晒三分一場，度士認為呢場最有投注價值，就係講呢點。
再睇韋斯咸，古比士利可謂「賊喊捉賊」，上輪作客反勝布力般流浪之戰所見，全賴球證睇漏眼先至贏波，可見韋斯咸為求護級，已到無所不用其極地步。睇番雙方人腳，主隊泰維斯上仗射入十二碼，佢同森莫亞已經連續兩場有「士哥」，進攻有保證。
米堡作客例牌走樣，加上活基治上陣成疑，艾卡受傷，占士摩利臣同卡達莫停賽，人腳緊，就算輸畀韋斯咸亦冇人怪得佢。
