護級生死戰錫菲聯高一線
命運豈能假手於人，梗係要操縱自己腳下！今晚英超煞科戰錫菲聯主場對韋根戰果，好大機會決定雙方護級命運！錫菲聯主場兩連勝，加上領隊禾諾克賽前講笑話想中場菲臘積基爾卡做後備門將，氣氛輕鬆，相比起超過兩個月未發過市，今場非勝不可韋根，玩錫菲聯主勝正路得多！（有線61及泰星U40台周日晚10:00直播）
先簡單描述目前護級形勢，錫菲聯至少和波就可護級成功；韋根必須贏波方能留級；如果韋斯咸不幸輸波，而韋根又能小勝錫菲聯話，則韋斯咸降班，錫菲聯同韋根攜手保留英超席位。
韋根連續3場食白果
言歸正傳，錫菲聯今晚幾可夫添出擊，只有前鋒侯斯肯定缺陣，賽前領隊禾諾克先為球員減壓，講笑話想將中場菲臘積基爾卡做後備門將，但實情呢名球員入選英格蘭國家隊B隊，禾諾克此番話分明想轉移球隊壓力，等球員今場可以專心應戰。
另外，錫菲聯上周作客雖大敗，但實際上球隊主場已經兩連勝且未失一球！最後順帶一提，錫菲聯今晚如能贏波兼爬過富咸以第十五名完成球季話，將可贏取賽會發放接近三百萬鎊獎金，有錢使得鬼推磨，一班球員為未來生計，你話點會唔搏到盡呢？
其實韋根如果護級失敗可謂咎由自取，皆因球隊自三月初贏曼城後，之後八場竟未發過市，超過兩個月未贏過波，今場想話突然反彈真係搵鬼信，再講佢近排連攻擊力都失靈，連續三場食白果，你話韋根仲有咩理由唔使輸波降班呢？
