英超除降班形勢緊湊，三個足協盃參賽資格亦爭崩頭，目前第五位愛華頓至第九位樸茨茅夫仍然有機會趕搭尾班車，不過排第八雷丁同第九樸茨茅夫今晚都遇上難纏對手，反先機會不大，估計愛華頓、熱刺、保頓可保住現時領先優勢，順利奪得足協盃入場券。
目前五至九位球隊中，以愛華頓今晚作客車路士最難踢，不過樂比認為就算佢輸波，亦唔會因此失去足協盃席位，事關打後幾支球隊贏波機會同樣唔高。
熱刺主場對曼城，後者表現向來神經刀，熱刺一分就可以入圍，以佢近期個勢，保住唔輸應該冇問題；另一場保頓主場對阿士東維拉，維拉近八場聯賽未輸過，遇上近五場未贏過保頓，足以消弭作客不利因素，和波機會亦高唱入雲。
有機會全部開和
至於雷丁同樸茨茅夫數字上仍有機會打入前七，只係雷丁今晚作客踢法硬淨布力般唔易啃，幸好布力般上周中打和熱刺後，已肯定緣盡足協盃，戰意稍遜下，雷丁有機會悶和對手。
至於樸茨茅夫主場戰績雖佳，但對手阿仙奴亦非善男信女，樸茨茅夫要取三分亦有難度。綜合各場形勢，樂比認為呢幾場賽事好大機會全部都和氣收場，各隊將保持目前排名過終點
