之前穿窿入水「銀河艦隊」皇馬，經過船長 同全體船員通力合作之下，近期終於成功修補，再次高速啟航，近七場聯賽贏出六場之多，直向西甲錦標進發。今晚佢巴拿貝主場迎戰個心已經飛去下周中歐協決賽愛斯賓奴，唔難全取三分，「讓球主勝」穩陣！（有線61及64、泰星U35台周日凌晨2:00直播）
皇馬季中又話換教練，又話大換血，仲話唔畀碧咸上陣搞到內訌，不過以上問題家陣統統唔見晒，近七場聯賽贏出六場，練卡比路留隊問題亦冇人再提，家陣上下一心，真係無堅不摧，遇神殺神、遇佛殺佛！淨係上星期連爭緊做三冠王西維爾領先一球之下，都畀佢反勝，就知唔講得笑。
愛斯賓奴留力踢歐協
冇錯，近排做皇馬還魂丹碧咸同羅賓奴今場同時停賽，之但係力奇發現復出一排巴西右閘施仙奴，演出都逐漸回復水準，有佢頂住代碧咸斬波，應該唔會差太遠，再加埋魯爾同雲佬踏入季尾輪流翻生，皇馬今期「托弗」，真係邊個擋得住先？
愛斯賓奴依家聯賽排第十一，正係冇好爭，鬥志已經輸一截，再加埋下周三仲有場歐協決賽等住佢踢，照力奇估計，有傷在身中場發電機迪拉彭拿同射手彭迪安尼，好大機會唔落場，至於仲會收起邊個？力奇相信絕對唔止兩件咁少。
仲有個重要數據提提大家，皇馬近五次主場對愛斯賓奴，原來係贏足五次，當中有四場贏兩球或以上，以「賓佬」今期個鬥心，想輸少球都難啦！
