美洲國家盃C組另一場賽事巴拉圭硬撼美國，兩隊上輪比賽遭遇，簡直係有天壤之別，巴拉圭大炒哥倫比亞五蛋，勇態盡現。反觀美國則大敗阿根廷腳下，亦都證明呢支「美國B隊」根本未夠班。難得巴拉圭今場「客勝」仲有1.78倍，有買趁早。（有線足球台61周二早上6時35分直播）
巴拉圭上仗取得大勝，單從比數上來睇，的確令人有意外，但睇番比賽情況，巴拉圭實在仲有力再入多幾球。球隊組織有效率，前鋒埋門把握力強，尤其係王牌射手辛達告魯斯弗到爆，上仗大演帽子戲法，呢位食胡人物上季拜仁鬱鬱不得志，依家將一腔怒火發洩美洲國家盃，Mic少睇佢打起信心之後，入波將陸續有來，再加上同樣腳風大順卡班拿斯，巴拉圭今場有望再演「入球騷」，有興趣不妨玩埋入球「大」。
美國新丁未夠班
由於巴拉圭最後一場分組賽對手係勁旅阿根廷，所以佢今仗一定會全力再取三分，提早篤定出線席位，否則對阿根廷陣有乜甩漏，衰收尾就唔抵啦！
另一邊廂，美國終於為佢派二線兵參賽付出代價，呢支「美國B隊」礙於質素有限，加上陣中球員缺乏大賽經驗，一打逆境波就陣腳大亂，如果今場畀巴拉圭先入波，隨時又再兵敗如山倒。
