美洲國家盃Ｂ組最後一仗，連敗的厄瓜多爾幾乎肯定出局，而巴西和波已足夠出線，但贏波賠率只有1.3倍，再追大盤好過。厄國後防曳兩仗失五球，於出局邊緣一係大舉進攻，一係就索性放棄，兩種條件都有利巴西入波，「大」盤有利可圖！（有線足球台61周四早上８時50分直播）
去年德國世界盃厄瓜多爾表現出色，殺入十六強僅敗於英格蘭出局，表現大獲好評，但是次大賽就無以為繼，頭兩仗分組賽先後輸畀智利及墨西哥，表現並非太差，但兩場就失五球，反映後防千瘡百孔，無論應付高波及小組入楔都力有不逮。目前佢仲未有分數，要出線只剩番數字上可能性。
厄軍入得失得
厄瓜多爾今次鬥巴西態度不離兩種，一係為保面子空群出擊求勝，一係就完全放棄。厄瓜多爾拒絕打死守，巴西要入波難度大減，而厄軍上兩仗都有波入，有望同巴西合演入球騷。
巴西今次重用二線兵，表現只係不過不失，但班靚仔都好有料，加上佢目前僅得三分，為出線仍要搶分，戰意、鬥心毋庸置疑，面對處於出局邊緣厄瓜多爾，巴西要入波仍然係游刃有餘。
羅賓奴今次大賽搏晒老命，上仗更大演帽子戲法踢到上身，今仗大有機會入到波。而因為右閘馬爾干受傷缺陣，鄧加轉用西維爾右翼丹尼爾，佢打法比起馬爾干更具侵略性，上仗玩到智利後防一戙都冇，今仗可成巴西進攻泉源。
