美洲國家盃A組最後一戰，委內瑞拉主場萬眾一心，可保不敗進身八強。烏拉圭雷聲大雨點小，踢來雜亂無章，各自為戰，作客讓平半難靠。主隊和波就肯定出線，烏拉圭打和亦大有機會成為兩支最佳小組第三名其中之一而晉級，今仗下盤係不二之選。（有線足球台61周三早上8時50分直播）
上輪賽事委內瑞拉對秘魯，後者受讓平半拿仁要下盤，最後主隊贏二比○，主辦國可謂命不該絕。近十三屆賽事委內瑞拉都分組賽出局，今次憑主場之利，距離出線只有一步之遙，全國鼎力支持下，呢股氣勢唔可以睇小，故雖然實力不及烏拉圭，但球員上下一心，戰意、鬥心均臻頂峰，主場受讓實在吸引。
烏拉圭攻力疲弱
分組賽抽完籤，烏拉圭被認為可以輕易晉級，但球隊兩仗演出令人失望，首仗吞秘魯三蛋，次仗鬥弱隊玻利維亞，又贏得對手一粒，演出毫無說服力。事實上，烏拉圭雖然有眾多球星壓陣，但新頭泰巴利斯明顯未能駕馭球隊，眾將各有各踢如烏合之眾，兩仗僅入一球就可顯示球隊攻力嚴重不足，作客根本冇讓波本錢。
今仗係分組賽最後一場，目前委內瑞拉四分高踞榜首，烏拉圭與秘魯同積三分，卻因得失球差不及對手而列第三。主辦國今仗只要賽和就肯定出線，睇住食心理壓力冇咁大。根據賽制，三組中兩支最佳小組第三名亦可晉級，如果烏拉圭呢場賽和就得四分，出線亦問題不大。打和一家便宜兩家，今仗下盤值捧外，進取可直取和波。
