首戰不敵墨西哥巴西，上仗立即重現王者本色，大數智利三球，當中羅賓奴個人更大演帽子戲法，技驚四座，賽後里約熱內盧傳媒大讚羅賓奴一個頂十個，智利聖地牙哥傳媒更以怪物比喻羅賓奴，可想而知該名皇馬前鋒狀態有幾弗，今場有佢度，巴西想入波根本「依絲執」！
厄瓜多爾瀕出局冇士氣
雖然費特因傷已經退隊，右閘馬爾干又因為肩膊受傷今場肯定缺陣，不過替補丹尼爾實力亦有番咁上下，隨時有過之而無不及，加上巴西依家得三分在手，今場一定要贏波，先肯定奪得出線權，你話戰意唔夠就假！
賽前被外界認為小組出線冇難度厄瓜多爾，勢估唔到依家排B組榜尾，其實佢今屆美洲盃真係輸壞個頭，首仗兩度領先之下不敵智利，跟手再輸埋畀墨西哥，可謂大勢已去，難怪領隊蘇亞雷斯上仗賽後公開向國家道歉，更暗示自己隨時被炒魷魚，正所謂上樑不正下樑歪，領隊都顧唔掂自己，你話厄瓜多爾班球員仲邊有心機踢，今場對住巴西，想唔輸都難！
