今晚兩場瑞典超中，卡爾馬「讓球勝」係好路之選。特利堡經過季初一輪虛火後已打回原形，表現係三支升班馬中最曳一隊，近五場聯賽僅取一分，本季三場作客聯賽全敗兼一球不入，數據曳到得人驚。卡爾馬狀態、質素均遠勝對手，贏兩粒輕而易舉。（周日晚11時開賽）
特利堡去季於瑞典甲以極穩固防守為搶分主要武器，最後成功奪冠升班，但去到超聯就係另一回事，開季次輪聯賽爆冷贏馬模後就無以為繼，五場聯賽僅取一分，其中對同為升班馬奧雷布洛，以及實力平平咸史達斯都全失三分，上輪聯賽主場鬥佐加頓斯雖有後防主力法卡羅復出壓陣，但仍淨吞三蛋，士氣跌到谷底，趁佢未回氣，唔使畀面繼續反底。
卡爾馬弗到震
卡爾馬目前穩佔榜首，近四仗聯賽贏三場，其中包括兩大勁旅佐加頓斯及艾夫斯堡，之後作客大破加爾斯三球，顯出球隊狀態一流。卡爾馬本季主場表現遠勝上季，對弱旅可以手起刀落。近三仗聯賽球隊共入六球，全部由唔同球員建功，反映球隊個個都弗，而且近三次主場對特利堡全部贏晒，「讓球主勝」2.2倍吼得過。
