剛返到香港，又同幾位知心好友大講波經，話題離唔開歐聯決賽AC米蘭贏利物浦二比一。其實Peter唔只一次大讚利物浦領隊賓尼迪斯係有料之人，不過呢位戰術大師去到今屆決賽行錯三步棋，俗語所謂老貓燒鬚。咁係唔係賓帥冇行錯棋就會贏到AC米蘭呢？Peter唔敢講，但可以肯定利物浦可以做得更好。
第一錯係擺辛頓落場，比較起以前巴塞以及車路士，佢表現已經大不如前，呢位荷蘭人去到歐聯決賽略嫌唔夠班；第二錯係派基維爾上陣，賓帥了解到AC米蘭對呢位澳洲人唔多熟，希望「打亂章」衝散對手防線，但衰在基維爾傷得太耐，身體狀態根本唔適合決賽出現。利物浦其實仲有本錢，奈何長人高治太遲入場威脅有限，呢個係第三錯，如果下半場即時換入效果會好得多。Peter雖體諒到領隊排陣要迎合多方面，但以戰論戰賓帥今次發揮係冇以前咁好。
華倫皇馬W乏味玩波膽
外國球評家有一句說話經常掛口邊，以中文直接翻譯就係「美麗並非冠軍，醜陋才是實際」，呢句正好形容今屆歐聯決賽，球迷們完全睇唔到悅目足球，係好典型決賽。而今晚兩支西班牙球隊華倫西亞以及皇家馬德里亦都一樣，為求聯賽冠軍佢都暫時放低悅目，實際地追求三分。兩支主隊「齋W」賠率偏低，Peter不如揀波膽，兩場都要主隊贏2:0及2:1。補充一句，夏天已來臨，歐洲聯賽歇暑之餘學生都放暑假，呼籲球迷減少投注，多時間陪仔女，為家庭投放更多精神吧！
