紐倫堡近五場得一勝一和三負，直到聯賽收爐戰至醒番大勝漢諾威三比○，近況都幾差，但其實俄羅斯箭頭沙安高、斯洛伐克國腳維迪已經好番，能夠同德國前鋒史哥夫重組「攻擊鐵三角」，唔好忘記，紐倫堡今季聯賽兩勝史特加，攻入七球當中有五球來自呢個數胡組合，真係倚天一出誰與爭鋒。
史特加贏德甲蒲到腳軟
睇番紀錄，紐倫堡對上一次德國盃，經已係一九六二年事，練美耶仲有機會成為首個分別贏取東德、德國盃賽冠軍頭，創造歷史，幾大都搏埋佢啦！仲有呀，史特加下季會出戰歐聯，即使紐倫堡呢場輸波，都能夠以德國盃亞軍身份出戰歐協，唔使住無謂壓力，球員發揮自不然更好。
另一方面，史特加練艾明費承認，佢重奪聯賽錦標後連續幾日瘋狂慶祝，就算球員無飲酒、無夜蒲玩到腳軟，備戰都唔慌好得去邊。唔可以唔提係，紐倫堡門將舒希化下季會加盟史特加，代替離隊希迪布蘭，呢鋪佢對住新老細，肯定會踢得特別醒神，避免被人話放水，隨時帶挈球隊捧盃
