兩輪國際賽後，英冠重燃戰火。多數英冠球隊國腳唔多，如今得到充分休息，今輪賽事戰果將較為正路，勁旅如打比郡、水晶宮等都可望贏波而回。而深陷降班危機盧頓，剛聘請前列斯聯頭布歷維做新主帥，球隊抖完一輪兼士氣回升，作客般尼受讓好路。
新特蘭係拿仁是日重心推介。「黑貓」踏入○七年後聯賽未輸過，士氣如虹正向直接升班席位全力衝刺，面對後防傷兵多籮籮卡迪夫城，就算作客亦坐和望贏，平手盤值得信賴。（周六晚10時開賽）
新特蘭係本季英冠奇，堅尼將病貓醫活，功力毋庸置疑。現時新特蘭狀態一流，今年十三場聯賽十勝三和，班波都唔住，可謂「不到升班心不死」，遇上競爭對手卡迪夫城，更加唔會畀對方任何機會。今仗「黑貓」雖然缺少前鋒卡路士艾華斯，而中堅諾斯禾菲亦大有機會因傷缺陣，但正如隊長韋赫特所講，新特蘭勝在板深度夠，前線干洛尼、史杜基斯、約基隨時候命，後防亦有國腳級華加補上，實力得以保持完整。
卡迪夫城後防穿窿
卡迪夫城於季尾慘受傷兵困擾，一對正選中堅包括隊長佩斯及荷蘭守將盧雲斯今仗都出唔到，加上中場鐵閘史米加亦有傷，嚴重影響球隊防守力。本季攻入廿一球，幾乎佔球隊得球一半射手祖柏，早前韌帶撕裂，雖然今仗有機會紮住上陣，但威力必定大大減低，卡迪夫城讓車馬炮點贏？
