保頓今晚英超主場迎戰錫菲聯，有本錢開出「半勝」，因為保頓領隊艾拿戴斯話，至少要拎到五十八分至有機會踢下屆歐洲賽，要求球員踢爭氣波終止三連敗，何況錫菲聯作客半場落後比率接近五成，梗係捧唔過啦。
錫菲聯客場六連敗
目前保頓聯賽得四十七分，艾拿戴斯認為要到歐洲賽入場券，至少要平到佢英超得分紀錄五十八分，甚至夠六十分至得，換句話球隊餘下八場聯賽，起碼要袋多十一分。佢話明目標係贏多四場，已經吩咐球員打醒精神招呼錫菲聯，事關對方聯賽作客差到暈，唔贏簡直係見到錢都唔識執。
錫菲聯○六年下半季錄得二百六十萬鎊盈利，原本係好消息，不過睇番紀錄，佢英超作客得三勝一和十一負，當中有七次半場已經落後，作客半場落後比例接近四成七，證明好打有限，加上佢首席射手侯斯經已因傷提早收咧，前線火力受到嚴重影響，想銳步球場結束作客六連敗，似乎未係時候，都係捧保頓開「半勝」實際
