德甲爆發重量級大戰，拜仁慕尼黑今晚主場硬撼史浩克04，唔似讓得起半球。事關拜仁今季欺善怕惡，對住同級對手根本無把握贏波，相反史浩克明顯係遇強愈強，練史隆卡仲得到高層信任，成功續約兩年，配合盧雲克蘭斯、華利拿兩件猛將復出，喜事重重抵捧！（有線62及泰星U35台周六晚9:30直播）
賽前馬卡爾話會盡全力攻破史浩克大門，爭取加盟拜仁後個人第一百個入球，可惜德國中場舒韋恩史迪加、雲邦美國際賽期間分別因為比賽、操練受傷，呢場需要「紮住」上陣，難免削弱拜仁中場組織同攔截能力，即使佢聯賽主場有八勝四和一負亦未必惡得出。
史隆卡續約加薪醒神
再講，拜仁今季聯賽火併榜首三隊得一勝兩和一負，完全無霸氣，相反史浩克對雲達不來梅、史特加及拜仁有三勝一和一負，明顯醒好多，原本被睇衰練史隆卡守得雲開見月明，年薪增加到八十萬鎊續約到二○○九年，可以話係大戰前最佳獎勵。
雖然史浩克有中場大腦連干繼續停賽，好在丹麥國腳盧雲克蘭斯已克服傷患復出，能夠同兩位好拍檔古蘭爾、哈利艾天托普重組進攻鐵三角。除此之外，曾經話提早收咧烏拉圭中場華利拿亦突然宣布好番，可以候命出戰增加史浩克後備力量，咁多喜訊，史浩克要延續近八場作客五勝三和走勢唔難。
