里賈納今季其實踢得唔差，但因為假波案被扣十一分，先搞到依家排尾四，否則的話排名應該係十大之內。所以佢實際表現其實比排名為好，今晚主場對已八場聯賽不勝錫耶納，值得睇高一線，小勝一比○或二比○應該冇問題！
里賈納借將交到貨
經過二月尾至三月初一個小低潮後，里賈納已經重上正軌，上仗中立場以四比一痛擊卡坦尼亞，對提升球隊信心就有好大幫助。由拉素借中場霍治亞狀態好弗，近四場聯賽入三球，係球隊進攻重心，另外門將甘柏洛奴近排表現唔錯，應該可以繼續做正選。
其實里賈納攻擊力唔差，除霍治亞，前鋒路蘭度比安基、尼高拉阿武羅素都交到貨，只係後防弱，近三仗就失六球。不過好彩今仗遇錫耶納就唔使擔心，因為錫耶納客場入球數字係全意甲第三少，近況就更不濟，近五仗只入一球，對住聯賽榜包尾兩支球隊帕爾馬同阿斯科利都淨輸○比一，睇怕都好難威脅到里賈納防線。不過佢自知攻唔掂就成日死守，所以甚少大敗，呢場淨吞一至兩蛋差唔多啦！
