今晚法國波激戰連場，除聯賽之外，仲有聯賽盃決賽上演。其中法甲連續六場冇波入羅連安特主場迎戰馬賽，勢必一開波就搶攻以求打破入球荒，面對作客表現不振馬賽，一於冷敲「半場主勝」！（now826台及無收費電視26台周六晚11:10直播）
羅連安特雖然陷於入球荒，但近兩仗盤路錄得一走一贏，證明佢狀態正在冒升。反觀馬賽表現始終欠說服力，近兩場作客半場均落後，似乎有初段慢熱毛病，而且靈魂列貝利目前仍然養傷，令馬賽作客更加難靠，羅連安特乘機偷雞半場取得領先優勢，絕對唔令人意外。
里昂國腳奔「波」爭盃受阻
至於聯賽盃決賽就爆發重量級對決，班霸里昂於巴黎中立場迎戰波爾多，力爭雙冠王。然而，里昂有九名法國國腳不獲國家隊領隊杜明歷放人，搞到練兵計劃大受影響，加上佢近期狀態亦唔見得標青，面對有麥哥特及達捷維爾等實力分子壓陣波爾多，法定時間內未必贏得出，「讓球客勝」值博！
前線傷兵多貝迪斯失「利」
最後玩埋西甲，貝迪斯主場對維拉利爾，似乎讓唔起平半。目前貝迪斯傷兵滿營，拿費爾蘇比斯、阿素及彭格迪統統有傷在身，令鋒力大受影響，加上練費南迪斯領軍下，貝迪斯贏波比率一直差強人意，維拉利爾已連續四仗不敗，猛將皮利斯狀態亦逐漸操起，受讓梗係要得過啦！
